Í útiveru njóta börnin þess að leika sér og hreyfa sig í hvaða veðri sem er, sumar, haust, vetur sem vor.
Hvar liggja tækifærin? Nýtið aðstæður hér og nú til að efla orðaforða barnanna. Hvaða orð notum við um: – útifatnað – veðurfar – útidótið – umhverfið í garðinum, s.s. sandur, mold, gangstétt, gras – samskipti, kurteisi.
Leikskólalóðin er hönnuð með þarfir leikskólabarna í huga. Þar geta börnin farið í hreyfileiki, hlaupið, klifrað, hoppað og skoppað. Í útiveru má ærslast að vild með hrópum og köllum. Börnin komast í snertingu við náttúruna og skynja umhverfi sitt með öllum skilningarvitunum.
Veðurfar, gróður, jarðvegur, fuglar, ánamaðkar, sniglar, pöddur og flugur eru hluti af námsefni leikskólalóðarinnar.
Í útiverunni er frjáls leikur í hávegum hafður og ímyndunarflugið blómstrar. Mikið er skrafað og rætt, spáð og velt vöngum, viðraðar hugmyndir, skipulagt og farið á flug inn í ævintýraheima. Hvaða efniviður er í boði?
• Hefðbundið útidót
• Rennandi vatn
• Trjádrumbar
•Ekkert nema það sem sjálf lóðin býður upp á
• Bækur t.d. um plöntur, skordýr, fugla…
• Matjurtagarður (sem þarf að hugsa um)
• Hefðbundið innidót út
• Mála, lita, skrifa, teikna úti
• Leira og nota náttúrulegan efnivið með