Í Fellahverfi eru um 90% barna með annað heimamál en íslensku. Verkefnið „Málþroski og læsi“ er samstarf leik- og grunnskóla sem miðar að því að efla orðaforða barna og foreldra þeirra samtímis. Markmiðið er að stuðla að inngildingu foreldra og gera þá að virkum þátttakendum í námi og leik barna sinna.

Lögð er áhersla á elstu börn leikskólanna og yngstu börn Fellaskóla. Til að brúa bilið milli heimilis og skóla eru nýttar fjölbreyttar leiðir:

Bækur sendar heim: Mánaðarlega fá börnin bækur sem tengjast þemum skólans.

Myndbönd og fræðsla: Foreldrar fá send sýnikennslumyndbönd um málhljóð og lestur (K-pals).

Túlkaþjónusta: Tryggt er að allir foreldrar geti tekið þátt á sínum forsendum með aðstoð túlka á fundum.

Auk þess er unnið náið með Menntavísindasviði HÍ að gerð efnis, þar á meðal upplestri á bókum sem sendar eru heim.

Verkefnið hefur þegar gefið góða raun. Daglega eykst áhugi barnanna á bókum og þau eru mun virkari í lestrarstundum. Jafnframt sýna niðurstöður að nemendur í 1. bekk ná hraðari tökum á bókstöfum og hljóðum en áður.

Fyrir foreldra er verkefnið valdeflandi. Það eykur íslenskukunnáttu þeirra, dregur úr þörf á túlkaþjónustu til lengri tíma og styrkir öll samskipti milli heimilis og skóla.

Sem hluti af verkefninu hefur verið búin til Youtube síðu þar sem finna má öll myndbönd sem búin hafa verið til í verkefninu tengt K-pals.