Í upphafi Jógaklúbbsins er gott að byrja á því að dempa ljós og spila rólega tónlist. Því næst fá allir sína dýnu og liggja á þeim í um það bil 5 mínútur. Síðan er farið í fjölbreyttar æfingar og teygjur með börnunum. Gott er að sýna þeim hvernig hver æfing er og ganga síðan á milli barna og aðstoða þau. Einnig er hægt að hafa hangandi uppi myndir af helstu jógateygjum og/eða æfingum.

Undir lok tímans er aftur farið í slökun þar sem börnin liggja á dýnunum sínum og þau hvött til þess að segja að minnsta kosti einn jákvæðan hlut við sjálfan sig. Fallegt er að enda jógaklúbbinn á því að frístundaleiðbeinandinn/ráðgjafinn segir við börnin ,,Það góða í mér mætir því góða í þér”. Þá eru einnig til mörg smáforrit þar sem hægt er að finna skemmtilegar æfingar sem börnin ráða við. Smáforritið Super Stretch getur verið gott að hafa til hliðsjónar í gegnum fjölbreyttar jógaæfingar, öndunaræfingar og slökun. Einnig er hægt að fara með börnunum í dýrajóga, þar sem að þau beygja sig og sveigja eins og dýr við ljúfa tónlist.