Skorað er á krakka á aldrinum 6-12 ára að senda inn sögur sínar á því formi sem þau kjósa. Smásögur, lag og texti, stuttmyndahandrit eða leikrit. Höfundar þeirra sagna sem valdar eru taka þátt í skapandi smiðjum þar sem fagfólk leiðbeinir höfundum og hjálpar þeim að ná sem mestu út úr sinni frásögn.

Sögur – verðlaunahátíð barnanna er lokapunkturinn á þessu stóra samstarfsverkefni þar sem verk barnanna eru verðlaunuð og þau fá tækifæri á að verðlauna það menningarefni fyrir börn sem þeim finnst skara fram úr.

Kosning fer fram á vef KrakkaRÚV. Markmið verkefnisins er að auka læsi og áhuga á íslenskum barnabókum og sögum og í leiðinni upphefja barnamenningu á Íslandi og sýna börnum að hverju hugmyndir þeirra geta orðið.